大富由極窮開始

1991年4月10日, 珠珠 公關小姐身歷聲, 成報

香港是個充滿機會之城巿，全世界無人不承認。有好多真人真事，都成為真實有用的啓示錄。馮波士在孖沙街時代袋得滿身馬纜，其時尚無狗纜面世，但無損於日後佢做大波士之面子。佢成功後樂善好施，誨人不倦，提拔後輩，熱心鄉邦建設，慷慨捐施。郭老細在九龍城賣芝麻糊時何曾想到自己會成為此間有數大富翁之一？今日郭波士成為富翁元老，而口碑亦甚佳焉。重有好多例子，舉出來都是撼人心弦，勵人向上之好教材。珠珠成日講，最老襯之革命家是鬥窮。你窮我窮大家窮，好日子從何處來。與其鬥窮，何如鬥富？你富我富大家富，不愁好日子不來也。

博士明係一個綜合體之佛學大師。但不可忘記，佢同時又係大商家。佢之經歷，也是離奇怪誕得很。佢之生活道路，多姿多采，由極窮到大富，但有一點，我未曾問及佢如何會對佛學有興趣？起點如何發生？第日同佢見面，一定要親口問個明白。

珠珠話佢，大富由極窮開始，此言並不誇張。原來佢一九四四年出生，五十年代初期是幾歲大兒童。其時何文田是木屋區，佢與眾多街童一樣，成為飢餓一族。有個好心人，看他樣子得意，惜無書讀，於是介紹佢入勞校就讀，五文學費。其時勞校為麥逢德時代。何明華會督對勞校貢獻甚鉅。麥逢德亦功不可抹。博士明十分向學，但時時遲到，又不時會曠課。班主任覺得奇怪，好端端一個學生，如何會咁？於是，呢個女教師實行家訪，家訪可以溝通學校與家庭，增進彼此了解。

不料這一訪問，令到佢珠淚漣漣，為自己學生哭泣。原來明仔並非逃學，佢放學幫人做小販，當時走鬼甚厲害，拉小販甚於捉大賊。明仔偶一走唔切，即時被拉去，無錢繳保，就在警署過夜。女教師聽罷明仔遭遇，此後更着力幫助呢個貧苦學生。勞校之教師，五六十年代有口皆碑，今時今日，仍能維持優良傳統，想不到女教師一滴眼淚，令明仔覺得世上存在溫情、正義和愛心。此後對呢個世界，充滿信心。

一滴眼淚，你話幾重要？為人師表者，宜乎咁樣作育英才。珠珠每想到有些男教師，向女生上下其手，不禁嘆道，世風日下，連黌宮都出現此等醜聞，真也吾不欲觀之矣。如果那個人面獸心嘅人之患果有性慾內逼，我願出錢佢叫鷄。叫鷄並非可耻行為，當然亦非可以歌頌者。珠珠一向主張管制娼妓，可以減少罪案，亦可令社會衛生獲進一步保障，同時不至令可憐之娼妓惶惶終日，受黑白兩道迫害和勒索。