奇行異狀我狐疑

公關小姐繽紛筆, 珠珠, 成報, 2000年2月26日

放生船上，聰博士明講奇行異狀，聽者滿腹狐疑，心中有個問號：都唔知係唔係嘅。

佢話，自袋中出千元鈔票兩張，放在桌上，十個人行過，十個人都會話，係二萬元，不是二千元。有人唔信，同佢打賭，輸家是對方。

另外，佢有一個棋局，自己一方，士象存之外，別無他子。對方有車馬炮兩士雙卒，但最後冇棋。

珠珠百思不解，士象雖存，卻無攻擊能力，何以令對方冇棋？

佢話不可不信，有江湖客同佢捉三萬銀一盤，就因為唔信邪，捉完一盤又一盤，連輸三盤。珠珠曰：可否降格捉三百蚊一盤？佢話唔捉錢都得，可惜船上無棋，不能即席示範。

賴波士亦話，此乃棋局，以前也曾聽過有此一局。

棋局無疑引人入勝。珠珠幼年，常到干諾道中大笪地，夜間燈火燦然，當時人稱平民夜總會是也。大笪地有無數攤檔，出售各種貨品，亦有賣涼茶、生果以至各種熟食檔，路邊打邊爐，坐矮櫈仔照大光燈，別饒風味。此外，醫卜星相測字攤，各有奇能異技吸引顧客。當時有個印象，至今猶記分明，有個白鬚飄飄老人，向相士請教前程，請求指點迷津。佢應該是問終局時轉問前程，斯為老當益壯者矣。

大笪地亦有男女唱家，絃索俱備，開場鑼鼓一響，顧曲周郎畢集，乃有妙齡歌女，戶展鶯喉，真有繞空三日之妙。

珠珠常常流連平民夜總會，往往自開場收場，逡巡不去。最吸引我者，就是那些一個又一個的棋局。攞棋局者何止有兩度，簡直是棋壇高手。

不過，佢地境況顯得十分寒傖，連大光燈都點不起，一支火水燈放在地攤下，光度僅可分出紅棋與藍棋耳。火水燈的燈筒很長，可以防風，燈筒頂端則見滿布煤烟，增加了這個行業的破落感。當時甚有興趣觀看人家入局，光顧者多以三、五元一局交易，顧客多數係輸家。棋局好公平，任你要何方，結果總是檔主為贏家。有時遇到久久無人幫襯的棋檔，珠珠也來一局，先問可否捉五毫子？五毫子都殺，於是入局，未曾贏過一次。