下崗生活亦逍遙

珠珠, 公關小姐繽紛筆, 2000年7月31日

博士明近獲一隻三十三轉舊碟，乃稀有品種，碟中兩支曲：卿何早嫁、江樓晚唱。是小明星所唱，舊帶之中，我亦有此二曲。兩支歌都歌味十足，唱得迴腸蕩氣。博士明決定將二曲轉為小碟，加上靚包裝，作為小禮物，分贈各友好。

博士明自嘲是下崗工人，不務正業，年中炒幾手股票，足矣。八十幾文佢猛叫人滙豐，呢次佢下崗大豐收矣。

廿九日有個拍賣會，推出近代名家書畫一批。佢睇中一把扇，估計賣價不高，幾萬文可以投得。我問佢獨買一扇何用？蓋收藏扇面，以一批一批計數者也。

佢話並非收藏，而係買把靚扇骨，將扇面套入，學水滸傳所言：公子王孫把扇搖。

佢已為我安排當日節目。下午四點半，美國肯尼迪西方大學假壽臣劇院，舉行二千年榮譽博士及博士學位頒授典禮，徐博士有份攞位，一眾捧場之後，去酒家打牌，佢就去拍賣會買扇。晚上飲酒唱歌作曲。在佢帶領下，如此下生活，不亦樂乎？

佢結婚廿五年，正籌備慶祝，計劃請三十友好，乘郵船遠洋慶祝。廿五年婚姻得來不易，君不見，那些名男名女，戶合戶離，話咁易劃上句號，又開展過另一段情，不斷重複過去的錯誤。佢地眼中，何物廿五年，開玩笑也。舊派人物之溫淳敦厚，另有魅力。

大編輯笑謂之曰：廿五年婚姻已經好難，廿五年婚姻仍然慶祝，難上加難，蓋證明雙方都未做老襯也。

博士明亦笑道：或者不是冤家不聚頭呢。

大編輯引經據典，證明冤家聚頭。佢話蒙古人同宋朝是世仇，蒙古人吞金滅宋而成立元朝。趙宋江山就喪在蒙古人手上。

當時宋朝少帝趙顯成為俘虜，與吐番公主邂逅。公主慕漢族威儀，隨與趙顯談情說愛，鬧出人命，所生孩子，即後來之元順帝。若果朱元璋不將元朝送走，元朝依然係姓趙的天下。

不過，元順帝之父好慘，五十幾歲時遭賜死，而公主亦暴卒，看情形是順上位，幕後人非殺人滅口不可也。