殯儀館是好地方

2000年7月14日, 珠珠, 成報

新盤樓宇認購出現熱潮，連賭王都叫人買樓趁早，股巿唔信唔信又踩油，連積弱股如新世界都標升超過一成，氣勢頗為凌厲。博士明話，有的氣氛至似樣，最忌一潭死水，此謂之七翻甦是也。

水位已高，乜股可買？佢介紹買滙豐。理由是滙豐落後於大巿，收購法國機構已敲定，股價應可減壓也，追回大巿升軌都值一百二十文有多。

佢剛自歐洲回來，同座飲茶，問佢有否參觀徐博士畫展，佢話唔經芬蘭個便，而且徐博士畫展今日至開幕也。

講到呢度，佢即時禁手機，打畀徐博士。我提醒佢，毋擾人清夢也。佢話唔怕，今日佢一定早起做嘢也。

果然，芬蘭時間是早上七點鐘。佢講完我講，問佢一切是否順利。傳來連聲嬌笑，曰：一切好順利。此乃意料中事，有中國大使館協助，事情好辦之至。

在芬蘭展罷，又搬去丹麥舉行。佢話我知，預計十九日回港，屆時定然搵我，浮一大白。珠珠在此，遙遙祝福佢兩地畫展成功，飲譽異域。徐博士為人好有風格，佢令人感覺到，不歌而樂，不華自艷，又和藹可親，常矜細行，樂於助人。

博士明話，佢留港時間有好多日，十九日請你去一個地方，今日去，明日返，去不去？

去何處？佢曰：去殯儀館。

珠珠大為疑惑，何以要在殯儀館過夜？佢解釋，是全國最大的殯儀館開幕，請我參加開幕儀式。

聽佢介紹，呢個係好地方。佛家對死，另有看法，處理十分珍重，所以形容為好地方。如何好法？原來此館幾百萬呎，提供一條龍服務，由開弔發引到靈堂致奠，擔幡買水，以至火化完成，安置骨灰，全部服務齊全。

此外，具備各種宗教的殯葬儀式，任由顧客選擇。

此館是商辦抑官辦？博士明話：當然官辦。官辦又關你事？事出有因。原來原址是個亂葬崗，當初建築工人掘地，忽見纍纍白骨，紛紛棄鋤而遁。主事者請博士明去作法，以安人心。佢除咗作法之外，更植風水樹，館前植兩樹，左松右柏，植樹儀式亦好隆重，主碑載文，寫明祝福儀式由博士明主持。佢話此館風水格局甚佳，業務必然興盛。珠珠曰：豈不是死得人多？