博士才情人共贊

一九九一年三月十四日, 珠珠 公關小姐身歷聲, 成報

博士明講佛，去年到蘇聯演講也講佛。今年初佢又到上海講佛。

佛學當然深奧博大，幾多智慧之人，生生世世講之講不完。博士明在上海講罷，即由學子提問，問及對馬列主義觀感，座上有黨政官員，如何作答？委實費思量也。

博士明不慌不忙，引訪蘇前例，說在蘇聯也曾有如此提問，蘇聯官員請他講真話，並保證佢可以安全離境。佢當時話：馬列主義有其理想一面，問題是執政的人，能否智慧運用。同是一杯水，牛飲水可以製造奶，蛇飲水會製造毒液。佢希望中國牛多於蛇。

博士明之師傅係羅博士，羅博士曾作預言，中國將會在國際間放一異彩，成為一個超級大國。

羅博士之預言，同錢博士之天人合一說法息息相關。錢博士晚年靜思默想，頓悟天人合一乃中國文化哲學精髓所在，非西方可比。西方文化一墜可以久沉，屬於幾難翻身個類，因為西方將精神物質分開，亦即人天分隔，人有人，人之外有個天。天，不能不寄托在宗教上。而中國歷來都是天人合一者。孔夫子之學說，特別强調天人合一之說。各名人亦將天命與人力並論。所以中國文化不會倒下，結論是我地威晒，東方的巨龍係我地。

錢博士係大學者，著作等身，桃李滿天下。大陸曾經對佢攻擊不遺餘力，但近年卻不斷出版佢之著作。海外有定見之學者，大陸捧，唔會格外開心；大陸罵，亦僅作如是觀。因為大陸之或捧或罵不外服從時政，不能作為準則。佢地捧得你，即是鬧得你；佢地鬧得你，即是捧得你。風物長宜放眼量，此之謂歟？

博士明走禪家路綫，同錢博士固有不同。

博士明之個人修為，亦甚到家，佢家財億萬，手中常戴一個表，價值百多元，而且使用已超過十年。呢一點，佢與超人李異曲同工。

何人得見超人李戴過靚表者？伯爵柯嘗嘆道：「如果人人學咗佢地二人，我就慘過遊刑矣。」

博士明屬於禾稈冚珍珠格。人民日報訪問港澳名人，並且出版一本名人錄，排名首位者即佛學博士兼地產商博士明，第二位是超人李。由此可見，博士明的確唔係嘢少也。

但你去皇后戲院前問問過往行人，有幾人識得博士明？更有傳奇者，博士明曾經行乞街頭，又做過車房仔。佢之發達史，就是一門值得深入研究的學問矣。

香港不乏成功人士，博士明亦傑出者。