你請客時我付鈔 2003年6月4日

成報, 公關小姐繽紛筆, 珠珠

博士明假皇朝設三Ｔ宴，筳開五席，居然有肉竹之樂。古人有言，絲不如竹，竹不如肉。絲者弦也，竹者管也，弦管比樂器，俱不如肉妙。蓋最優良的音韻出自人的聲喉，即肉也。

博士明贏馬，正獎四百幾萬，另有多條安慰獎。但今夕埋單，找數唔係佢，李廠東堅決表示，你請客，我付鈔。

有咁着數？有。花旦鄧美玲做義務司儀，佢請李廠東登台講解，為何踴躍付鈔。

聽落知道，呢個世界，利益交往，絕無單線，一定係雙線發展。踴躍付鈔就是雙線發展的結果。

原來佢同博士明去東莞睇廠，之後去佛山探瓊霞，瓊霞係粵劇名旦，色藝俱佳。博士明無端端執張舊報紙，揚開馬經，靈機一觸就要買馬，劃咗三關，公開招股，瓊霞冇興趣，李廠東做咗成半。博士明即致電回港，叫人落注，總投注二萬幾。話咁易中正三關，李廠東分得六十萬，承蒙帶挈，不得不踴躍付鈔也。

鄧美玲又請博士明上台講幾句。博士明並非講贏馬心得，卻講健康與人生大道理。佢慨嘆依家的後生仔，冇大冇細，見了前輩，當面叫師傅，背後罵老鬼，第三句就是阻住地球轉，冇高冇低，破壞承傳關係，想發就難。

開場弦管跟住上，先由鄧美玲牡丹亭。呢個職業花旦，近期歌藝大有進步，好的開始後，孫韻跟上，兩位鼎鼎大名琴師拍和。孫韻以前係名記者，後轉營商，名成利就。今弘做票友，唱支《鳳還巢》，外江佬叫好。佢有一副好歌喉，又有肉彈身材，視聽之娛齊晒。顧曲周郎，能不陶陶然乎？

再由王少秋唱《紅娘》。佢係中華文化學會副主席，又係該會屬下京劇研習社社長，唱功一流。一曲唱來，有埋做手關目，博得掌聲雷動。佢十八歲當軍，不受紅妝愛武裝，此之謂也。後轉浙江電台播音，十多年前來港，在商界與藝術界雙線發展，至今常常去上海視察業務。

壓軸戲由博士明鄧美玲合唱《觀柳還琴》，博士明居然有板有眼，拍住職業花旦，絲毫不怯場。老友大編輯，佢時時秘密練兵者也。