不合懸置觀音像

公關小姐繽紛筆, 珠珠, 成報 (2000年1月9日)

世界首席俗家佛學博士是誰？博士明（郭兆明）是也，佢係傳奇人物，言行時時出人意表。話佢笨伯，卻又如此聰明；話佢聰明，往往又做笨伯。

年前佛山仁壽寺重建，奠基禮請博士明增光。佛山宗教局陳局長客客氣氣請博士明提意見，例牌耳。

博士明真不客氣，老老實實上書三千言。真有心機，蓋寫咁長係冇稿費者也。佢從現場聽到，重建仁壽寺之目的係令佛教徒有一個正規為法場所。博士明本止惡行善、慈悲平等，慧觀緣起、無常無我、報國家恩、報師長恩、報眾生恩宗旨，乃有洋洋大觀一封長信，而且又係彈多過讚，你這是否出人意表？

佢首先指出主席台上安放觀音像是不如法，觀音神像是三千多年前由印度土教的護法神馬演變過來，傳入中國時是現男相形象，後來混入虛構妙善公主是觀音神化身的小說，演化變成女相。觀音節是千三多年前雲南白族的傳統節日演變而成。現今佛教是國際性宗教，如用佛教招牌舉辦活動，應該懸掛釋迦牟尼像才合規格。

博士明於是指出席儀式的師姑和尚不學無術，着起如來袈裟賣假佛法，可悲矣也。

為此，當日佢拒絕上主席台，與那一群師姑和尚排排坐。

佢又指出，後多旅遊點的寺院由師姑和尚負責寺廟的事務，呢種情形間接破壞了出家人的本分和因緣，佢認為極不妥當。

佢話，亞洲佛教國家如泰國、印度、緬甸、柬埔寨、斯里蘭卡、蒙古等，佛教都以逃避為主，導致人民對人生之積極性大為削弱。釋迦牟尼在尼泊爾出生，該國現今出產啹喀兵著名，現已日見其少矣，窮困不堪，可證人民生產積極性不夠。博士明用馬克思科學精神批判佛教，指出當年釋迦說法，是根據二千多年前的印度情況而言；若他活到今天，佛經定有補充和修訂版矣。

佢又發覺，仁壽寺重建格局與現代化環境極不相稱，破壞佛山的昌盛氣場，俗稱風水是也，佢主張重建模式可參考釋迦牟尼文化紀念館，即是刪除導人迷信個啪是也。

佢又話，利用長生祿位出賣神像籌集建費，會藏機不淨，引來歪果，應予改進，呢一點，珠珠要問博士明，若不如此，立有拮据之危，點搞？若待善緣感應相助，又不知何年何日也。